Во рамки на проектот CITYMOVE, кофинансиран од Европската унија преку програмата Interreg IPA Adrion, Општина Свети Николе беше учесник на третата партнерска средба од 22 до 24 септември во Мостар Босна и Херцеговина. Покрај состаноците на работните тимови, беше организиран и Ден на урбана мобилност, на кој се промовираше користењето на одржливи форми на транспорт и здрави животни стилови.
Учесниците од партнерските градови и општини возеа велосипеди низ улиците на Мостар во рамки на одбележувањето на Европскиот ден без автомобили, испраќајќи јасна порака за значењето на намалувањето на зависноста од автомобилите и поттикнувањето на еколошки прифатливи решенија. Програмата продолжи со еко-тура и активности за рекреација и промоција на здрави навики, а беше одржано и предавање за урбанистичко планирање и мултимодален транспорт.
Градоначалникот на Општина Свети Николе, Дејан Владев преку видео порака, ги поздрави присутните партнери и истакна дека гледа во урбаната мобилност можност за современ и еколошки развој на градот, насочен кон подобра иднина за сите жители од регионот.
Проектот CITYMOVE ги обединува партнерите од осум држави:
Бар (Црна Гора) – водечки партнер, Мостар (БиХ), Биоград на Мору (Хрватска), Нови Пазар (Србија), Свети Николе (Македонија), Губио (Италија), Мат (Албанија), Кантанос-Селино (Грција) и институтот CIHEAM (Грција).
Придружени партнери се NALAS (Македонија) и Општина Лесковац (Србија).
Главната цел на проектот е намалување на зависноста од автомобилите преку унапредување на инфраструктурата и промоција на користење на еколошки превозни средства во рамки на Јадранско-јонскиот регион.
Во рамки на проектот се изработуваат локални планови за одржлива мобилност, заеднички транснационален план, како и мобилна апликација за велосипедски и пешачки патеки.
За Општина Свети Николе, проектот ќе донесе конкретни резултати:
• набавка и инсталација на соларна автобуска постојка,
• поставување на соларна станица за полнење на електрични тротинети и велосипеди,
• изработка на локален план за одржлива урбана мобилност,
• организирање на настани за промоција на одржлива урбана мобилност.
Учеството на Општина Свети Николе на оваа средба придонесе за размена на искуства, зајакнување на партнерските односи и споделување на идеи за развој на одржлив, модерен и еколошки ориентиран транспортен систем.
Повеќе информации за програмата Interreg VI-B IPA ADRION 2021–2027 може да се најдат на следниот линк:
https://www.interreg-ipa-adrion.eu/
